قصيده ام لولدها ورده عليها ^,^

مافي غير قلب الام هوا اللي يحس بالضنى
هوا اللي يعرف الشعور والاحساس
اخليكم مع قصيجه رووعه بكل معنى الكلمه

قصيدة أم نايف لولدها:

أصـــيح باعلى الصوت نايف فقدناك
عساك تسمع صرختي يوم أناديك
أنا أمك اللي عيـــــدها يوم لـــــــقياك
يا سعد نفسي لو عيوني تــــلاقيك
والقلب نــــــــاره تشتعل عقب فرقاك
ما تطفي النيران يا كــــود أياديك
لبست ثوب الحـــزن بعدك ولا انساك
والنــــــوم ودّع يوم غابت لـياليك
تاهـت بي الخطوات وادروبي أشواك
والدمع من عيني على الخد يبكيك
أراجع الماضي واعــيد ذكـــــــــراك
تشدني الذكرى وابـــكي لماضيك
سجـــين بالغــربة وياكـــبر بلـــــواك
الله يعينك دايم في بــــلاويـــك
هذا القدر مكتوب ... مكتوب ما جاك
اصبر عسى الله بالنهايه ينجــــيك
بديار ( بوشٍ ) سجنك الموحش هناك
ياليت لي قدره على الدرب واجيك
يا ســـــجن ارفق مسندي وسط مبناك
ما شاف شمس ومظلمات مبانيك
مدري يا عمري كيف الأحوال ويّـاك
طمــني عنك طمن امك تحـاتيك
من يغسل اهدومك ومن قـــام يرعاك
ومن يطبخ الوجبات منهو يواسيك
ومــنهو الذي بالليل لا نمت غــــطاك
خوفي عليك البرد بالـحيل يوذيك
ودي قبل مــــــــــوتي مشاهد محياك
ودي أضمك في يديني وحــــاكيك
يا حافر قبري دخيــــــلك رجيـــــناك
تحط فوق النصب نيشان بوصـيك
يمكن يحين الوقت ترجع لمــــــرباك
وتزور قبري مسـرع في خطاويك
يا سيــــــــــدي سلطان تكفى طلبناك
يا راعي الفزعات تشكر مساعيك
شلال طيــب منبعه دوم يمــــــــــناك
خيرك مغطــي كل بيت باراضيك
وقت الشدايد ما لها غير شـــــــرواك
يبشر بعزه كل من جاك ناصيك
يا ســــــــــــــيدي سلطان حنا فداياك
بارواحنا نفديك نفديك نفــــــديك
الجود وانت الجود يمشـــــي ببمشاك
يمشي وراك ويتبـعك ما يجاريك
يتـــعبني مدحك لو أعدد سجــــــاياك
والشعر يرفع رايتـــــه ما يوفيك
يالله عسى المولى يصــونك ويرعاك
ويعود نايــف يا عسى الله يخليك
أبختصرها يا ذرى كل من جـــــــاك
شكوى تجيلك تنتهي ما تعــــديك

وعند وصول الخبر لابنها نايف في السجن قام بالرد على قصيدة امه ..

وهذي قصيدة نايف (رد على أمه)

سر ياقلم واكتب من الشعر ديوان
عنوانها المسجون نايف يعاني
صفحاته الجدران والحرف سجان
غلافه القضبان هذا مكاني
أنا السجين إللي له القيد عنوان
سجني مؤبد ويلي الموت جاني
وأنا الغريق إللي من الهم غرقان
يارب فرج كربتي وامتحاني
روح ربيع العمر واصبح خبر كان
كاس المرارة قدمه لي زماني
يالوعة المسجون والحظ خوان
بين الزوايا السود حظي رماني
خلف الحديد اليوم والحال نقصان
زوراي الأحزان هدت كياني
وليت ياسجن التعاسة والأحزان
فيك النكد والمر ماجاء كفاني
طيور سعدي هاجرت كل الأغصان
من بعدها وحدي حزين أعاني
ماتت جذور القلب والورد ذبلان
مدري الحزن اشريه ولا شراني
الهم في صدري كما نار بركان
والفرح مركب ما رسى بالمواني
يمه يمه مسافة بيني وبينك أوطان
لكن خيالك مايفارق ثواني
محتاج لك بالحيل مشتاااق ولهان
يمه وليدك فاقد له حناني
افز من نومي ووأنا كنت حلمان
ياليت حلم الليل يمك خذاني
سجادتي والذكر والليل قرآني
دايم ونيسي يوم ربي بلاني
ياميمتي ماخاب من قال سلطان
يمناه توصلني لبر الأماني
مشهود له بالطيب في كل ميدان
لو أحصي الأفعال يتعب لساني
رمز الكرم والجود من دون برهان
خيره يغطي كل قاصي وداني
ياسيدي سلطان ياطير حوران
يافزعة المظلوم سجني كواني
يالله يإللي خالق الإنس والجان
نرجي نعيمك ربنا بالجناني
تحفظ لنا سلطان من كل شيطان
ويفك قيدي ما أبي شي ثاني ما أبي شي ثاني